ბიძინა ივანიშვილის განცხადებით, ის მზად არის წყალტუბოში 22 სასტუმრო და
9 აბანო გამოისყიდოს და მათი სრული რეაბილიტაცია განახორციელოს. ივანიშვილი ამბობს, რომ ის ობიექტების ნებისმიერ ეტაპზე გასხვისებაზეა თანახმა.
“მზად ვარ, პროექტის განხორციელების ნებისმიერ ეტაპზე, იქნება ეს დაგეგმარება, პროექტირება, მშენებლობა თუ დასრულების შემდეგ, ექსპლუატაციაში ჩაშვება, გავასხვისო ეს ობიექტები ნებისმიერ ინვესტორზე, რათა შემდგომში მან გააგრძელოს წარმატებული ოპერირება. ბუნებრივია, ჩემი მხრიდან არანაირ მოგებაზე არ იქნება საუბარი, მაქსიმალური ფასი იქნება თვითღირებულება. ამავდროულად, მე მზად ვარ დაინტერესებულ ბიზნესს ეს პროექტები გადავცე ფასდაკლებით, ან უფრო მეტიც, მნიშვნელოვანი ფასდაკლებით.
ამ ნაბიჯით მსურს, ერთი მხრივ, მივცე სიმყარე ბიზნესს, რათა ის ნებისმიერ ეტაპზე შემოუერთდეს პროექტს, ხოლო მეორე მხრივ, სახელმწიფოს მივცე სტიმული, გარანტირებული ინვესტიციის პირობებში, მაქსიმალურად განავითაროს ინფრასტრუქტურა,”-ნათქვამია ივანიშვილის განცხადებაში.
ივანიშვილის წყალტუბოს განვითარების ხედვა და კონცეფცია ეყრდნობა წამყვანი შვეიცარული საკონსულტაციო კომპანიის, “KოჰL&Pარტნერს” მიერ შემუშავებულ გეგმას, რომლის ფარგლებში, წყალტუბოში დამატებით უნდა აშენდეს ბავშვთა მოედნები, წყლის პარკი, ტროპიკული ბაღი, გოლფის და ჩოგბურთის მოედნები, კლდეზე ცოცვის პარკი, სავაჭრო ცენტრი, კაფე-ბარები.
დაგეგმილია საგანმანათლებლო ცენტრის გახსნა პროფილურ სპეციალობებში.
ივანიშვილის განმარტებით, წყალტუბოს რეაბილიტაცია იმერეთის მხარეს გადააქცევს ჯანმრთელობისა და ტურიზმის, ახალგაზრდობისა და განათლების მძლავრ, საერთაშორისო ცენტრად.
საბოლოო ჯამში, რეგიონში დასაქმდება 15 000 – 20 000 ადამიანი.