საქართველოს მუნიციპალური განვითარების ფონდის ინფორმაციით, ვანის
არქეოლოგიური მუზეუმის სარეაბილიტაციო სამუშაოები გრძელდება. მათივე განმარტებით, უკვე დასრულდა ახალი ოთხსართულიანი შენობის (მუზეუმის) მშენებლობა, ასევე, მოეწყობა ავტოსადგომი, მცირე ბიბლიოთეკა, ლაბორატორია, კაფეტერია და საოფისე ოთახები ადმინისტრაციისთვის.
“პროექტის დასრულების შემდეგ, ის საერთაშორისო სტანდარტებს გაუთანაბრდება და რეგიონში ყველაზე გამორჩეული მუზეუმი იქნება. სარეაბილიტაციო-სარეკონსტრუქციო სამუშაოები ხელს შეუწყობს ვანის არქეოლოგიური სივრცის დაცვას, ტურისტული ინფრასტრუქტურის განვითარებას და ადგილობრივი მოსახლეობის დასაქმებას,”-ნათქვამია მუნიციპალური განვითარების ფონდის მიერ გავრცელებულ ინფორმაციაში.
რეაბილიტაცია მსოფლიო ბანკის დაფინანსებით ხორციელდება.
ვანის არქეოლოგიურ მუზეუმს 1985 წლის შემდეგ რეაბილიტაცია არ ჩატარებია.
ფოტო:საქართველოს მუნიციპალური განვითარების ფონდი