“მმართველ გუნდს სურს კომფორტულად,
სახლთან ახლოს ჰქონდეთ პარლამენტი” – ასე ეხმაურება “ევროპული საქართველოს” წევრი ამირან ძოწენიძე ქუთაისიდან თბილისში პარლამენტის შესაძლო გადატანას. ძოწენიძე ყურადღებას იმაზე ამახვილებს ჯდება თუ არა ძვირი პარლამენტის ქუთაისში შექმნა და ამბობს, რომ თუ ცვლილებები რეგლამენტშიც შევა ქუთაისი იმ ფუნქციასაც დაკარგავს, რაც საპარლამენტო ქალაქის სტატუსის ფარგლებში ქუთაისს ჯერ კიდევ აქვს.
“გასაგებია, რომ მმართველ გუნდს სურს კომფორტულად, სახლთან ახლოს ჰქონდეთ პარლამენტი. ჩუსტებში გაუყარონ ფეხი, გადაირბინონ პარლამენტში და გადმოირბინონ სახლში. გასაგებია ეს, მაგრამ ეს ქვეყანაა. ერთია, რომ ვის რა უნდა და მეორე – რა სჭირდება ქვეყანას. დათვლილია, რომ ქუთაისის პარლამენტი ყველა ხარჯით უფრო ეფექტურია, ვიდრე თბილისში სტალინის დროინდელი შენობის შენახვა. პარლამენტის აქ წამოღებამ აქტუალური გხადა ყველა პრობლემა. წყალი უნდა იყოს, ინფრასტრუქტურა მოწესრიგებული უნდა იყოს, სისუფთავე უნდა იყოს და ა.შ. ამას დამატებული 2 ათასი სამუშაო ადგილია პირდაპირ. ქალაქისათვის, სადაც ყველაზე მაღალია უმუშევრობის დონე, ყოველი მეორე ადამიანი უმუშევარია და ახალგაზრდობის პრობლემაც ესაა მათთვის ეს კარგი შესაძლებლობა იქნებოდა. ახალა საუბარია იმაზე, რომ რეგლამენტიდანაც ამოიღებენ ქუთაისს, როგორც საპარლამენტო ქალაქს და ეს ნიშნავს, ქუთაისი საპარლამენტო ქალაქის ფუნქციის იმ ნაწილსაც დაკარგავს, რაც მას აქვს”,- განაცხადა ამირან ძოწენიძემ.
ქუთაისი, როგორც საპარლამენტო ქალაქი, შესაძლოა რეგლამენტიდანაც გაქრეს. მმართველი გუნდიდან უმარავლესობის დეპუტატები მიიჩნევენ, რომ რეგლამენტში ქუთაისი პარლამენტის ადგილსამყოფელად არ უნდა იყოს მითითებული.